هەواڵێن سەرەکی

ژ چارچۆڤێ پرۆژێ خواندنا تەکنیکی و پیشەیی یا کەسک و دیجیتاڵی بۆ زێدەکرنا دەلیڤەیێن کاری ل عێراقێ (TVET III) و ​ب پشکداریا نوینەرێ سەرۆکا زانکۆیا پۆلیتەکنیک دهۆک پ. هـ. د. یەمان سامی شەریف، هاریکارێ سەرۆکا زانکۆیێ بۆ کاروبارێن زانستی و خواندنا بلند، و ب ئامادەبوونا نوینەرێن لژنا بلند یا پێشخستنا پەروەردە و خواندنێ، ئەمینداریا گشتی یا جڤاتا وەزیران، و نوینەرێن هەردوو وەزارەتێن خواندنا بلند و ڤەکۆلینێن زانستی ل حکومەتا فیدراڵی و حکومەتا هەرێما کوردستانێ، دگەل سەرۆکێن زانکۆیان و نوینەرێن دەزگەهێن پشکدار، ڕێکخراوا نەتەوەیێن ئێکگرتی بۆ پەروەردە، زانست و ڕۆشنبیری (یونسکۆ) سەرەدانەکا زانستی بۆ زانکۆیا کۆیە ڕێکخست.

​ب مەرەما ئالۆگۆڕکرنا شارەزاییان و ئاگەهداربوون ل سەر ئەزموونا زانکۆیا کۆیە د بوارێ گۆهۆڕینا دیجیتاڵی و بەردەوامیا ژینگەهی (کەسک) دا. هەروەسا لێگەڕیان و ڤەدیتنا وان پراکتیک و ئەزموونانە کو دشێن مفای ژێ وەربگرن و د ناڤ زانکۆیێن تەکنیکی یێن عێراقی دا بهێنە بجهئینان، و پێخەمەت سەرخستنا ڤێ سەرەدانێ و ب دەستڤەئینانا ئارمانجێن وێ یێن زانستی، تیمێن ڕێکخەر و یونسکۆ هەمی ئامادەکاریێن لۆجستی، بەرنامەیێ کاری، و تێبینیێن چەمکی ب هەردوو زمانێن عەرەبی و ئینگلیزی دگەل پشکداران پارڤەکرین، و د هەمان دەم دا، کەناڵێن پەیوەندیێ یێن تایبەت هاتنە تەرخانکرن بۆ کارئاسانیا هەماهەنگیێ، بەرسڤدانا پرسیاران، و دروستکرنا گەنگەشەیێن ئاڤاکەر د ناڤبەرا ئەکادیمیستان و تیمێن ڕێکخەر دا.

​ئەڤ گاڤە وەک بەشەک ژ بزاڤێن بەردەوام دهێتە هەژمارتن بۆ پێشخستن و هەڤچەرخکرنا خواندنا تەکنیکی یا بلند ل سەرانسەری عێراقێ ژ لایێ ئێکەتیا ئەوروپا ڤە دهێتە پشتەڤانیکرن و ب هەماهەنگی دگەل هەڤپشکێن نیشتمانی ژ لایێ ڕێکخراوا یونسکۆیێ ڤە دهێتە بجهئینان ب هێڤیا وێ چەندێ کو پشکداری و دانوستاندنێن ئەکادیمی ببنە هاندەرەک بۆ بجهئینانا گۆهۆڕینێن بنەڕەتی یێن ژینگەهی و تەکنۆلۆژی ل دەزگەهێن خواندنێ.