هەواڵێن سەرەکی

پێخەمەت پێشئێخستنا پەیوەندیێن زانستی یێن دەرڤە و دابینکرنا دەلیڤێن خواندنێ بۆ قوتابیێن هەرێما کوردستانێ، پ. د. ئاری عادل، سەرۆکا زانکۆیا پۆلیتەکنیک دهۆک، ب ئامادەبوونا هەر سێ هاریکارێن خۆ، پێشوازی یا د. یاسین سالح، رێڤەبەرێ گشتی یێ فەرمانگەھا ھنارتیان و پەیوەندییێن رەوشەنبیری و کولتووری و ستافێ دگەل دا یێ وەزارەتا خواندنا بلند و ڤەکولینێن زانستی کر.

ب ئامادەبوونا پ. د. موئەیەد برکات، ھاریکارێ سەرۆکا زانکۆیێ بۆ کاروبارێن کارگێری و دارایی، ​پ. هـ. د. یەمان سامی شەریف، ھاریکارێ سەرۆکا زانکۆیێ بۆ کاروبارێن زانستی و خواندنا بلند، و ​پ. هـ. د. نوزت صادق، هاریکارێ سەرۆکا زانکۆیێ بۆ کاروبارێن قوتابیان، دانوستاندن ل سەر چەندین تەوەرێن گرنگ هاتنە کرن، وەک:

• ​ستراتیژیا پەیوەندیێن دەرڤە: تەکەزی ل سەر چەوانیا پەرەپێدانا پەیوەندیێن زانستی یێن زانکۆیا پۆلیتەکنیک دهۆک ل گەل زانکۆیێن هەرێمی و نێڤدەولەتی هاتە کرن.
• سکۆلەرشیپ (پێدانا بورسان): گەنگەشە ل سەر ڤەکرنا دەرگەهی سکۆلەرشیپێ (پێدانا بورسان) بۆ راکێشان و وەرگرتنا قوتابیێن بیانی و نێڤدەولەتی ل زانکۆیێن هەرێما کوردستانێ.
• ئاسانکاری و نەهێلانا ئاستەنگان: هەلسەنگاندنا رێنما و سیاسەتێن وەزارەتا خواندنا بلند بۆ نەھێلانا بەربەستان و دروستکرنا ئاسانکاریان د بوارێ هەڤکاریێن ئەکادیمی یێن دەرڤە دا هاتە بەحسکرن.

ل دوماهیێ، سەرۆکا زانکۆیێ تەکەزی ل سەر وێ چەندێ کر کو ئەڤ بزاڤە دچنە د چارچۆڤێ کارنامەیا زانکۆیا پۆلیتەکنیک دهۆک دا بۆ بلندکرنا ئاستێ زانستی و ڤەکرنا دەرگەهێ زانکۆیێ ب روویێ جیهانا دەرڤە و پێشخستنا کەرتێ خواندنا بلند ل هەرێما کوردستانێ.