هەواڵێن سەرەکی

ئوردن

​د چوارچۆڤێ چالاکی و پەیوەندیێن زانستی یێن نێڤدەولەتی دا، زانکۆیا پۆلیتەکنیکی یا دهۆک ب رێیا کادرێن خۆ یێن ئەکادیمی پشکداری د دیدارا 27ێ یا قوتابیێن داهێنەر دا کر، ئەوا ل زانکۆیا زەیتوونە یا وەلاتێ ئوردن هاتیە ئەنجامدان.

​د ڤێ دیدارا نێڤدەولەتی دا، کو ژ لایێ "المجلس العربي للتدريب والإبداع الطلابي" ڤە ساڵانە دهێتە رێکخستن و ل رۆژێن 2 تا 6ی تشرینا دووێ يا ساڵا 2026 بڕێڤەچووی، د. ئازار عابد، سەڕۆکێ پشکا تەکنەلۆجیا زانیاری کارگێری (ITM) ل کۆلیژا تەکنیکی کارگێری، وەک نوێنەرێ زانکۆیا پۆلیتەکنیکی یا دهۆک پشکدار بوو.

​خۆلا ئەڤ ساڵە یا دیدارێ ل ژێر درووشمێ

"فێرکرن و راهێنان د سێبەرا پێشڤەچوونا تەکنەلۆجی دا" هاتە سازکرن.

د ڤێ چوارچۆڤێ دا، پێشبڕکێ و هەڤڕکی د ناڤبەرا 60 ڤەکۆلین و داهێنانێن ئەکادیمی یێن قوتابیێن جۆراوجۆر یێن زانکۆیێن وەلاتێن عەرەبی دا هاتە ئەنجامدان.

​ل سەر ئاستێ هەڵسەنگاندنێ، د. ئازار عابد وەک ئەندامێ لیژنا هەڵسەنگاندنێ (لجنة التحكيم) رۆڵەکێ کاریگەر و بەرچاڤ د دیارکرن و هەڵسەنگاندنا کار و داهێنانێن پشکداربوویان دا گێڕا.

ئەڤ پشکداریکرنە وەک دەستکەفتەکێ ئەکادیمی بۆ زانکۆیا پۆلیتەکنیکی یا دهۆک دهێتە هەژمارتن و نیشانا ئاستێ بلندێ زانستی و شیانێن کادرێن زانکۆیێ یە ل سەر ئاستێ ناڤخۆیی و نێڤدەولەتی.