هەواڵێن سەرەکی

ل ژێر چاڤدێرییا وەزارەتا خاندنا بلند و ڤەکۆلینێن زانستی، زانکۆیا پۆلیتەکنیک دهۆکێ (DPU) ب فەرمی ئێکەمین پێشبڕکییا نێڤدەوڵەتی یا داهێنانێ (Start Cup Competition) بڕێڤەبر. ئەڤ پێشبڕکییە ل ژێر درووشمێ

"ژ هزرێن خۆجێی بۆ کارتێکرنا جیهانی: داهێنانا دەرڤەیی سنووران بۆ کۆمەڵگەهێن بەردەوام و گەشەپێدانا هەرێمی" هاتە ئەنجامدان.

​د ئەڤێ روویدانا ئەکادیمی و کارسازیێ دا، نەهـ تیم ژ حەفت زانکۆیێن کوردستانێ (زانکۆیا پۆلیتەکنیک یا دهۆکێ، زانکۆیا ئاکرێ یا زانستێن کرداری، زانکۆیا زاخۆ، زانکۆیا دهۆک، زانکۆیا پۆلیتەکنیک هەولێر،زانکۆیا پۆلیتەکنیک سلێمانی و زانکۆیا گەرمیان)، هەروەسا دگەل زانکۆیا (UNINT) یا ئیتالی و زانکۆیا مورسیا یا ئیسپانی، هزر و پڕۆژەیێن خۆ یێن کارسازیی پێشکێشی لژنەیەکا هەڵسەنگاندنێ کرن، لژنە ژ پێنج ئەندامان پێکدهێت کو نوونەراتییا کۆمەڵگەها مەدەنی، ئیدارەیێن خۆجێی، کەرتێ پیشەسازی و دەرچوویێن زانکۆیێ دکەن، ئەڤ چەندە ژی دەرفەتەکا مەزنە بۆ پەیداکرنا پەیوەندییان و گوهۆڕینا ئەزموونان د ناڤبەرا قوتابی و مامۆستایان دا ل سەر ئاستێ نێڤدەوڵەتی.

​ئەڤ روویدانە قۆناغەکا گرنگە ژ پڕۆژەیێ (RISE) یێ سەر ب پرۆگرامی (+ Erasmus) ڤە، کو ژلایێ ئێکەتییا ئەوروپا ڤە پالپشتی یا دارایی لێ دهێتە کرن و ژلایێ رێکخراوا (UNIMED) ڤە دهێتە سەرپەرشتیکرن. پڕۆژە کو ژ شوباتا ٢٠٢٥ دەستپێکرییە و هەتا کانوونا دووێ ٢٠٢٧ دێ بەردەوام بیت، ئارمانج پێ نێڤدەوڵەتیکرنا زانکۆیێن کوردستانێ و باشتر ئامادەکرنا دەرچوویانە بۆ بازاڕێ کارێ یێ پاشەڕۆژێ.

​دپەیڤا ڤەکرنا پێشبڕکییێ دا، پ. د. ئاری عادل، سەرۆکا زانکۆیا پۆلیتەکنیک دهۆک، بخێرهاتنا زانکۆیێن پشکدار کڕ، ئەنجامدانا ئێکەمین پێشبرکی ب پێنگاڤاکا گرنک دا زانێن کو ئەڤ چالاکی یە ب قۆناغا "ژ ڕاهێنانێ بۆ کریارێ" دهێنە نیاسین، کو تێدا زانکۆیان نەخشەڕێ و ڕاهێنانێن خۆ خستنە د واری جێبەجێکرنێ دا، وژلایەکێ دیڤە گرنگی یا ئارمانجێن گەشەپێدانا بەردەوام یا نەتەوەیێن ئێگرتی (17 SDGs) دا دیارکرن و جەخت ل سەر چارەسەرکرنا کێشەیێن خۆجێی و پاراستنا ژینگەهێ کرن. هەروەسا ئاماژە ب دەستکەفتێن زانکۆیا پۆلیتەکنیک دهۆکێ ژی د بوارێ ژینگەهـ پارێزیێ دا دیارکرن ب تایبەت پشتی ئەنجامدانا کۆنفرانسی نێڤدەوڵەتی یێ کەشوهەوا (ICCMES 2026) و بدەستڤەئینانا پلەیا ئێکێ ل سەر ئاستێ پارێزگەها دهۆکێ و پلەیا سێ یێ ل سەر ئاستێ هەرێما کوردستانێ د رێزبەندییا (Green-Metric) یا نێڤدەوڵەتی دا.

​د دووماهییا گۆتارێ دا، سەرۆکا زانکۆیێ پەیامەکا پشتەڤانیێ ئاراستەی قوتابییان کر، کو تێدا وەک " قەهرەمانێن راستەقینە یێن ئەڤرۆ" دانە نیاسین، هەروەسا ئاماژە ب وێ چەندێ ژی دا کو ب وێرەکی هزرێن خۆ پێشکێش بکەن و مفا ژ تێبینییێن لژنەیێ وەربگرن، ژبەرکو چ دئەڤێ پێشبرکیێ دا ببنە یێن ئێکێ یان نە، ئەڤ پشکدارییە دێ بیتە ئەگەرێ ب دەستڤەئینانا ئەزموونەکا باش و دێ پەیوەندییێن نووی و باوەرییەکا زێدەتر دەتە وان بۆ پێشخستنا شیانێن قوتابیان. هەروەسا سوپاسییا ئێکەتییا ئەوروپا، رێکخراوا UNIMED، لژنەیا هەڵسەنگاندنێ، و تیمێ رێکخەر یێن زانکۆیا پۆلیتەکنیک دهۆکێ هاتە کرن بۆ سەرخستنا ئەڤێ چالاکییا گرنگ.