هەواڵێن سەرەکی

بەغدا

​د چارچۆڤێ بزاڤێن پێشئێخستنا كەرستێن خواندنێ و بەرهەڤكرنا دەرچوويان بۆ بازارێ كارى، زانكۆيا پۆليتەكنيك دهۆك پشكدارى د وۆركشۆپەكا نيشتيمانى دا كر ل بەغدا، كو ژ لايێ رێكخراوا يۆنيسكۆ (UNESCO) و ب پشتەڤانيا ئێكه‌تيا ئه‌وروپى هاتبوو رێكخستن د چارچۆڤێ پڕۆژێ (TVET III) دا.

​د ڤێ وۆركشۆپێ دا، كو د. شێروان مصطفى سێفدين، رێڤەبەرێ پەيوەنديێن نێڤدەولەتی ل زانكۆيا پۆليتەكنيك دهۆك، و د. فائز سعيد فيزى، رێڤەبەرێ سەنتەرێ گەشەپێدانا كاري (CDC) تێدا پشكدار بوون، پێنج سياسەتێن گرینگ هاتنە راگەهاندن. هەروەسا وەزارەتا خواندنا بلندا حكومەتا هه‌رێما كوردستانێ پلانا خۆ يا بجهئينانێ دگەل ئه‌نجامێن ڕاپرسيەكا بازارێ كارى پێشكێش كر، كو تێدا گرنگترين شارەزايى و ئاستەنگێن ل هەمبەر گونجاندنا خواندنا تەکنيكى هاتبوونە دياركرن.

دئەڤێ چالاکیێ دا ​نێنەرێن زانكۆيا پۆليتەكنيك دهۆك جەخت ل سەر گرنگيا بهێزكرنا هەڤكاريێ د نێڤبەرا زانكۆيان و كەرتێ گشتى و تايبەت دا كر، ب مەبەستا تێكهەڵكرنا شارەزاييێن كەسك (Green Skills) و ديجيتالى د پڕۆگرامێن خواندنێ دا. ئارمانج ژ ڤێ چەندێ بەرهەڤكرنا قوتابيان و دابینکرنا دەليڤێن كارى يە بۆ دەرچوويان، دا كو پشكداريێ د ئاڤاكرنا ئابووريەكا باوەرپێكری و هاڤچەرخ دا بكه ن.