هەواڵێن سەرەکی

زاخۆ

ڕێکەفتی ٣٠ی تەموزا ٢٠٢٦ێ

​ل ژێر چاڤدێریا سەروکاتیا زانکۆیا پۆلیتەکنیک دهۆک و زانکۆیا زاخۆ، و ب ئامادەبوونا هاریکارێن سەرۆکێن هەر دوو زانکۆیان بۆ کاروبارێن زانستی و خواندنا بلند، نڤیسینگەها ڕاوێژکاری یا زانکۆیا پۆلیتەکنیک دهۆک باوەرنامەیێن پشکداریکرنێ ب سەر ١٤ کادرو ستافێن زانکۆیا زاخۆ دا بەلاڤکرن، پاش ب دوماهیک هاتنا ​خولا مەشق و ڕاهێنانێ یا تیوری و کردای ئەوا بۆ دەمێ سێ ڕۆژان ل ژێر ناڤ ونیشان

"پڕۆژێ بەرهەمئینانا ناڤەڕۆکا ڕاگەهاندنا زانکۆیێ"

ژ لایێ نڤیسینگەها ڕاوێژکاری یا زانکۆیا پۆلیتەکنیک دهۆک ڤە هاتبۆ ڕێکخستن، ب مەرەما پێشئێخستنا ئاستێ ڕاگەهاندنا ئەکادیمی ل هەردوو دەزگەهان.

​شاندەکێ فەرمی یێ زانکۆیا پۆلیتەکنیک دهۆک ب سەرۆکایەتیا پ. هـ. د. یەمان سامی شریف، هاریکارێ سەرۆکا زانکۆیێ بۆ کاروبارێن زانستی و خواندنا بلند، ب ئامادەبوونا م. محسن حسن، ڕێڤەبەرێ سەنتەرێ ڕاوێژکاری و مامۆستایێن ڕاهێنەرێن خولێ، سەردانا زانکۆیا زاخۆ کر و ب فەرمی باوەرنامەیێن بەشداریکرنێ پێشکێشی هەر 14 پشکداران کرن.

​ل لایەکێ دیتر، پ. هـ. د. جاسم محمد عبدو، هاریکارێ سەرۆکێ زانکۆیا زاخۆ بۆ کاروبارێن زانستی و خواندنا بلند، وەک ڕێزگرتن ل بزاڤ و ماندیبوونا تیمی ڕاهێنەران، ژلایێ خۆ ڤە رێز و سوپاسنامە و باوەرنامەیێن ڕێزلێنانێ ئاڕاستەی مامۆستایێن خولێ د. ڕەوان صبحي، م. سەرکەفت ڕەشید، م. عبید صبحي، م. ڕاستی خلیل، و م. کارکەر خلیل کرن، و ڕۆلێ وان ل پێگەهاندنا ستافێ زانکۆیا زاخۆ ب بلندی نرخاند.

​ل دوماهیکا ڕێورەسمان، هەر دوو هاریکارێن سەرۆک زانکۆیان جەخت ل سەر بەردەوامیا هەماهەنگی و کارێن هەڤپشک کرن پێخەمەت بلندکرنا ئاستێ زانستی و ئەکادیمی ل زانکۆیێن دەڤەرێ. هەروەسا ئەڤ جۆرە خولە وەک پێنگاڤەکا گرنگ و کارا هاتنە هژمارتن بۆ سەردەمیانەکرن و بەرەڤپێشبرنا کارێ ڕاگەهاندنا زانکۆیێ ل سەر بنەمایێن ئەکادیمی.