هەواڵێن سەرەکی

لژێر چاڤدێریا وەزارەتا خواندنا بلند و ڤەکۆلینێن زانستی یا عیرقێ و هەرێما کوردستانێ و ب ئامادەبوونا نوینەرێن وەزیرێن خواندنا بلند و ڤەکولینێن زانستیێن حکومەتا هەرێما کوردستانێ و حکومەتا عیراقا فیدارل و ژمارەکا سەرۆک زانکۆ و هاریکارێن سەرۆک زانکۆیان و جێگرێ پارێزگارێ دهۆکێ و ڤەکۆلەر و ماموستایێن ناڤەندێن خواندنێ یێن هەرێما کوردستانێ و عێراقێ و هەشت وەلاتان، ئەڤرۆ ڕۆژا چوار شەمبی ڕێکەفتی 29/10/2025 "شەشەمین کونفرانسێ نێڤدەوڵەتیێ ئەندازیاریا کارەبا یا میکانیکی و کارپێکریێن وێ" ( ICEMIA-6) دەستپێکێر بو ماوێ دو روژا ب هەڤپشکی یا زانکۆیا پۆلیتەکنیک دهۆک، زانکۆیا تەکنولوجی، زانکۆیا تەکنیکی یا باکوور، زانکۆیا ئەلنور، زانکۆیا زەهرا و کولیژا کوربەندێ ئەلنەهرەین یێ زانکۆ، ل هۆلا ئازادی یا پەیمانگەها تەکنیکی دهۆک هاتە برێڤەبرن.

کونفرانسی ب چەند ئایەتێن قورئانا پیروز و رێزگرتن ل سەر گیانێ شەهیدان دەستپێکر و دیڤدا "پ. د. ئــاری عـــادل" سەرۆکا زانکۆیا پۆلیتەکنیک دهوک ژبلى بخێرهاتنێ دپەیڤەکێ دا گوت : ئەڤ کۆنفرانسە نوێنەراتیا کردارەکا تایبەت یا پلاتفۆرمەکا زانستی دکەت، کو ڤەکۆلەر و بسپور و شارەزا و ئەندازیارێن هەر ئێک ژ وەلاتێن (بریتانیا، ئەمریکا، روسیا، ئوسترالیا، مالیزیا، تونس، ترکیا و ئیران کۆمڤەکرینە بۆ ئاڵوگۆرکرنا زانیاری و ئەزموونان، پێخەمەت وێ چەندێ دانوستاندنێ لسەر دویماهیک پێشکەفتنێن بوارێن ووزەیا نویبوونێ، میکاترۆنیکس، ئەندازیاریا کەرەستان، سیستەمێن ئەلیکترۆنی، زیرەکیا دەستکرد، تەکنیکێن زیندەوەری، و چەندین تایبەتمەندێن دی هەروەسا دێ کار کەن بۆ ڤەدیتنا نەخشە رێکێن نوى بۆ پێشکەفتن و گەشەپێدانا ئابووری لسەر بنەمایێن زانستى و زانیاریان، هەروەسا سەرۆکا زانکۆیێ سوپاسیا حکومەتا هەرێما کوردستانێ و هەر دوو وەزارەتێن خواندنا بلند و ڤەکولینێن زانستى یا هەرێما کوردستانێ و حکومەتا عیراقا فیدرال و هەمى لایەنێن هاریکار کر ئەوێ کار بۆ سەرئێخستنا کونفرانسی کڕی.

ژلایەکێ دیڤە (پ. د. محسن نوري حمزة) سەرۆکێ زانکۆیا تەکنولوجی دپەیڤەکێ دا ئەنجامدانا ئەڤی کونفرانسی ب هەڤپشکی یا زانکۆیێن حکومی و تایبەت ب پێنگاڤەکا باش دا دیارکرن وسۆپاسیا زانکۆیێن هەڤپشک کر، و دیڤدا پەیڤا وەزارەتا خواندنا بلند یا هەرێما کوردستانێ ژلایێ (پ. د. امیر عبدالرحمن) بریکارێ وەزارەتا خواندنا بلند ڤەکولینێن زانستی ڤە هاتە خواندن و دەستخوشى ل زانکۆیێن هەفپشک کڕ و گرنگیا ئەڤان جورە کونفرانسا ب پێنگاڤەکا باش دا زانین، هەر دبرگەیێن کونفرانسی دا پەیڤا وەزارەتا خواندنا بلند و ڤەکۆلینێن زانستی یا عیراقێ ژلایێ نوینەرا وان (پ. د. عالیاء عباس العطار) سەرۆکا زانکۆیا تەکنیکی یا باکوور ڤە هاتە خواندن و سوپاسیا زانکۆیا پۆلیتەکنیک دهۆک و زانکۆیێن هەڤپشک کڕ کو هەردەم دکاردکەن بۆ ئەنجامدانا کونفرانس و کاروچالاکیێن زانستى.

ل دویماهیێ و بەری رونشتنێن زانستیێن ڤەکولەران بهێنە پێشکێشکرن (پ. د. غسان عبدالرحمن بلال) پەیڤا کونفرانسێ پێشکێشکڕ و چەند رونکرنەک لسەر کونفرانسی دانە دیارکرن و گوت: ڤەکولینێن ئەڤى کونگرەى دێ ل گوڤار و جهێن باوەرپێکری هێنە بەلاڤکرن، و دبەرگەیا دەستپێکرنا روینشتنێن سمیناران دا (پ. د. جمال محمد) ژ وەلاتێ ئیرانێ ئێکەم سمینارا کونفرانسی پێشکێشکڕ و دیڤدا مەتالێن کونفرانسی ژلایێ سەرۆک زانکۆیێن پشکدار ڤە هاتنە بەلاڤکرن، و ل دانێ ئێڤاری سمینارێن کونفرانسی دچوار هولێن خواندنێ یێن جودا جودا دا ژلایێ ڤەکولەران ڤە هاتنە پێشکێشکرن.