ده‌رباره‌ی زانكویێ

دەربارەی زانکۆیێ

زانکۆیا پۆلیتەکنیکی یا دهۆک (ناڤێ وێ یێ نەفەرمی DPU یە) دامەزراوەیەکا خواندنێ و ڤەکۆلینێ یە و دکەڤیتە هەرێما کوردستانا عیراقێ. دگەل پێشکەفتنا بلەز یا هەرێما کوردستانێ، گوهۆڕینێن بەردەوام د پێتڤیێن پەروەردێ و فێرکرنێ دا هاتینە کرن بۆ پڕکرنا پێتڤیێن جڤاکی؛ د دەه سالێن بۆری دا، رێژەیا وەرگرتنا قوتابیان و هەژمارا دەزگەهێن خواندنێ گەشەکرنەکا بەرچاڤ بخۆڤە دیتیە.

وەکی زانکۆیەکا حکومی یا هەەمەجۆر، زانکۆیا پۆلیتەکنیکی یا دهۆک ژ شەش پەیمانگەهێن تەکنیکی و پێنج کۆلیژێن تەکنیکی پێکدهێت کو ل سەر شەش قەزایێن پارێزگەها دهۆکێ هاتینە دابەشکرن. زێدەباری ڤێ چەندێ، دوو پەیمانگەهـ و دوو کۆلیژ ل قەزا ئاکرێ هەبوون کو پاشان ژ زانکۆیێ جودابوون و ل ساڵا ٢٠٢٣ێ بوونە پشکەک ژ زانکۆیا ئاکرێ بۆ زانستێن کارپێکری. هەر کامپوسەک ژ ڤان کامپوسان خزمەتا دەڤەرەکا دیارکری دکەت کو پێتڤیێن تایبەت ب بوارێن تەکنەلۆژیا، ساخلەمی، ئەندازیاری، پیشەسازی، کارگێری، چاندن، ژمێریاری و بوارێن دی یێن پەیوەندیدار هەنە.

زانکۆیا پۆلیتەکنیکی یا دهۆک ل ساڵا ٢٠١٢ێ هاتیە دامەزراندن، ئێکە ژ سێ زانکۆیێن پۆلیتەکنیکی ل کوردستانێ کو ل ژێر چاڤدێریا وەزارەتا خواندنا بلند و ڤەکۆلینێن زانستی یا حکومەتا هەرێما کوردستانێ یە. ڕەگ و ڕیشالێن وێ ڤەدگەرن بۆ کۆنترین دەزگەهێ خواندنێ ل پارێزگەها دهۆکێ کو ل ساڵا ١٩٨٨ێ هاتیە دامەزراندن، و پتر ژ ٥٥,٠٠٠ دەرچوویێن هەین ژ دەمێ دامەزراندنا وێ تا نوکە.

وەرگرتن ل DPU ل سەر بنەمایێ نمرێن ئامادەیی یە، و دەوام ل دووماهیا مەها ئەیلولێ دەستپێدکەت و ل دووماهیا مەها حوزەیرانێ ب دووماهی دهێت. زانکۆ چەندین بەرنامەیێن خواندنێ پێشکێش دکەت کو دبنە ئەگەرێ بدەستڤەئینانا بروانامەیێن دبلۆم، بەکالۆریۆس، ماستەر و دکتۆرا. پڕۆگرامێن خواندنێ ب هوویری و ل ژێر چاڤدێریا پشکا دلنیاییا جۆری دهێنە دارشتن.

پڕۆگرامێن نوو ناهێنە ڤەکرن هەتا کو ستاف، جهـ، تاقیگەهـ و ئامیرێن پێتڤی نەیێنە دابینکرن. ئەڤ پڕۆگرامە ب شێوەیەکێ هویر دهێنە دیزاینکرن دا کو دگەل ستراتیژیێن حکومی و پێتڤیێن بازاری بگونجن. نوکە DPU د قۆناغێ دارشتنا پلانەکا ستراتیژی دایە بۆ وەڵامدانەڤەیا دەزگەهێن هەلسەنگاندنا نیشتمانی و پیوەرێن نێڤدەوڵەتی یێن باوەرپێکرنا ئەکادیمی، کو ئەڤە ژی جەختێ ل سەر پێگیرییا زانکۆیێ ب نایابییا ئەکادیمی دکەت. هەروەسا، زانکۆ ب چالاکی پەیوەندیێن خۆ دگەل زانکۆیێن نێڤدەوڵەتی ب رێکا یاداشتنامەیێن لێکتێگەهشتنێ (MOUs) بهێز دکەت.

1.1 دیدە (Vision)

بینینا زانکۆیەکا پێشەنگ د بوارێ پەروەردەیا پۆلیتەکنیکی، راهێنان و ڤەکۆلینان دا، و کارکرن بۆ گەشەپێدانا هەرێما کوردستانا عیراقێ.

1.2 پەیام (Mission)

پێگەیاندنا دەرچوویێن تەکنیکی یێن خودان شیان و ڤەکۆلەرێن خودان ئاستەکێ بلند یێ زانین و داهێنانا تەکنەلۆژی، بۆ گەهشتن ب پیوەرێن نێڤدەوڵەتی یێن دلنیاییا جۆری ب گۆرهەی پێتڤیێن بازاری ل کەرتێ گشتی و تایبەت.

1.3 بهایێن سەرەکی (Values)

بهایێن سەرەکی یێن زانکۆیێ ئەڤەنە:

بەپرسیاریەتی (Accountability): زانکۆ بەرپرسیاریەتیا بڕیار، کار و ئەنجامێن خۆ هەڵدگریت.

دەسپاکی (Integrity): پێگیری ب ڕەوشت و پرەنسیپێن بلند بۆ بدەستڤەئینانا باوەری و رێز و ناوبانگەکێ باش.

قوتابی تەوەرە (Student Focused): قوتابی ستوینا سەرەکیا جڤاکێ مە نە، و ئەم هەوڵدەن باشترین ئەزموونا فێربوونێ پێشکێش بکەین.

نایابی (Excellence): بزاڤکرن بۆ گەهشتن ب بەرزترین ئاستێن شارەزایی د بوارێن ئەکادیمی، ڤەکۆلین و کارگێری دا.

رێزگرتن (Respect): سەرەدەریەکا ب رێز و دادپەروەرانە دگەل هەموو کەسان بێ جوداهی.

سەرکردایەتیا ڕەوشتی (Ethical Leadership): نیشاندانا نموونەکا باش د سەرکردایەتیکرنێ دا ل سەر هەموو ئاستێن زانکۆیێ.

کارێ تیم (Teamwork).

هەمەجۆری (Diversity).

پێشوەچوونا بەردەوام (Continuous Improvement).

دادپەروەری (Justice).