زانکۆیا پۆلیتەکنیکى یا دهۆک روژا ئالایێ كوردستانێ بلند راگرت


زانکۆیا پۆلیتەکنیکى یا دهۆک بیروەریا روژا ئالایێ كوردستانێ ل سەروکاتیا زانکویێ و گشت کولیژ و پەیمانگەهێن تەکنیکى یێن زانکویێ پێروز کر و ئالایێ پیروزێ کوردستانێ بلندکر دگەل سرودا نشتیمانى یا ئەى رەقیب.

ئەڤرو روژا سێ شەمبى رێکەفتى ١٧/١٢/٢٠١٩ ب چاڤدێریا (پ. د. عدنان محسن عبدالعزیز ) سەروکێ زانکویا پولیتەکنیکى یا دهوک و ب سەرپەرشتیا هەر سێ هاریکارێن سەروکێ زانکویێ و ب ئامادەبونا راگرێن کولیژ و په‌یمانگه‌هێن ته‌كنیكى یێن زانکویا پولیتەکنیکى یا دهوک بیرەوەریا روژا ئالایێ كوردستانێ دناڤا سنورێ پارێزگەهێ و دەرڤەرى سنورێ پارێزگەهێ ب گێرانا چه‌ندێن چالاكیان و ب پشکداریا ماموستا و فه‌رمانبه‌ر و قوتابیان هاتە هاتە ساخکرن و ئالایێ پیروزێ کوردستانێ ل گشت کولیژ و پەیمانگەهێن تەکنیکى هاتە بلندکرن.

ل دەمژمێر ٩:٣٠ سپێدێ ل باخچێ سەروکاتیا زانکویێ و ب ئامادەبونا گشت ماموستا و فەرمانبەرێن سەروکاتیا زانکویێ رێورەسمێن روژا ئالایێ كوردستانێ دگه‌ل وەسیەتناما پێشەوا( قازى محمد) و گوتنا سرودا ئه‌ى ره‌قیب ئالایێ کوردستانێ ژلایێ هاریکارێن سەروکێ زانکویێ (د. صلاح عبدال) و (د. زیرک عزیز خان ) و (پ.هـ. د. رجب ابراهیم ) هاتە بلندكرن، پاشان هه‌ژماره‌كا زور ژ ئالاێن كوردستانێ ب سه‌ر ماموستا و فه‌رمانبه‌رێن سەروکاتیا زانکویێ هاتنە بەلافکرن .

پشتى رێورەسمێن بلندکرنا ئالایێ کوردستانێ ل سەروکاتیا زانکویێ هاتینە برێڤەبرن هەر ئێک ژ (د. زیرک عزیز خان ) هاریکارێ سەروکێ زانکویێ بو کاروبارێن زانستى و(پ.هـ. د. رجب ابراهیم )  هاریکارێ سەروکێ زانکویێ بو کاروبارێن قوتابیان ب هه‌ماهه‌نگى دگەل راگرێن کولیژا تەکنیکى ئەندازیارى و کولیژا تەکنیکى کارگێرى و پەیمانگەها تەکنیکى یا دهوک و پەیمانگەها تەکنکى کارگێرى یا دهوک، پشکدارى د رێورەسمێن کولیژ و پەیمانگەهێن نافهاتى دا کر و رۆژا ئالایێ كوردستانێ بەرز و بلند راگرت ،و هەر بڤێ هەلکەفتێ زاروکێن شەهید و پێشمەرگێن قارەمان و سەرکەفتیێن چه‌ندین چالاكیان هاتنە خەلاتکرن و هەردیسان چه‌ند هوزان و ستران ژى ب ئالایێ کوردستانێ هاتنە گوتن ژلایێ قوتابیان ڤه و ل دوماهیێ ب كه‌یف خوشی یادا ڤێ روژێ و ب دیلان و شەهیان دكه‌ش و هه‌وایه‌كێ خوش دا راگر وماموستا و فه‌رمانبه‌ر و قوتابى ب هه‌ڤرا به‌شدارى دگێرانا ئاهه‌نگێ بوون

 

دهێتە زانین :  ئالایێ کوردستانێ ئالایێ کوردستانێ ژ چوار رەنگا پێک دهێت

رەنگێ سور رامانا خوینا شەهیدان

رەنگێ سپێ رامانا ئاشتیێ

رەنگێ کەسەک رامانا سروشتێ کوردستانێ یە

 رەنگێ زەر رامانا روژەکا گەشە

٢١ تیشکێن روژێ رامانا سەرسالا کوردانە

و ئەف ئالایە ب رەنگ و رامان ڤە وەک ناسناما گەلێ کوردستانێ دهێتە زانین و بو جارا ئێکێ ئالایێ کوردستانێ ل رێکەفتى ١٧/١/١٩٤٦ ب ئامادەبونا قازى محمد ل کومارا مهاباد ل ئیرانێ هاتیە بلندکرن و پشتى کەفتنا کومارا مهاباد ئالایێ پیروزێ کوردستانێ رادەستى بارزانێ نەمر جنرال مەلا مستەفا بارزانى کریە ، و ل رێکەفتى ١١/١١/١٩٩٩ پەرلەمانێ کوردستانێ یاسایا ئالایێ کوردستانێ پەسەند کر و ل رێکەفتى ١٩/٦/٢٠٠٩ ب بریارا پەرلەمانێ کوردستانێ روژا ١٧/١٢ وه‌ك روژا ئالایێ كوردستانێ ب فه‌رمى هاتیه‌ دیاركرن بو هەر کوردەکى و ل هەر جهەکێ لێ بیت و ژبەر ڤێ چەندێ هه‌مى سالان ئه‌ڤ روژه‌ ل گشت دام و ده‌زگه‌هێن حكومى و حزبى یێن هه‌رێما کوردستانێ و چەندین ناڤه‌ند وجهێن گشتى ل ده‌رڤه‌ى هه‌رێما کوردستانێ دهێته‌ ساخكرن و زانکۆیا پۆلیتەکنیکى یا دهوک ژى ب شەش کولیژ و هەشت پەیمانگەهێن خو یێن تەکنیکى ڤە ڤێ بیرەوەریێ ب بلندکرنا ئالایێ کوردستانێ و چەندین چالاکیان نوى دکەت.

© هەمی ماف دپاراستینە بو زانکۆیا پولیتەکنیک دهۆک