کونفرانسێ پەرەپێدانا سەنتەرێن جيَندەرناسی ل زانکویێن کوردستانێ
بو پتر گرنگی دان ب بارودوخێن ژنان و ب زانستی کرنا پرسێن ژنان ل کوردستانێ، ئەڤ سالە وەزارەتا خواندنا بالا و ڤەکولینێن زانستی، ب ھەڤکاری د گەل ئەنجومەنا کاروبارێن خانمان، ب ھەلکەفتا ٨ ی مارس ل روژا جیھانیا ئافرەتان، لژێر دروشمێ (كومه‌لگه‌یه‌كی سه‌قامگیر زاده‌ی به‌هێزی ژنانه) ، كونفرانسێ په‌ره‌پێدانا سه‌نته‌رێن جێنده‌رناسی ل زانكویێن هه‌رێما كوردستانێ ، ب چاڤدێریا (قوباد تاله‌بانی) جێگرێ سه‌روكێ ئه‌نجومه‌نێ وه‌زیران ل ده‌مژمێر 10 سپێدێ ل هولا (سه‌عد عه‌بدولا) ل هه‌ولێرێ ساز كر.
د ڤی کونفرانسی دا، پێدڤیاتیا ڤەخاندنا کێشە و گیر و گرفتێن ژنان ژلایێ زانکویێن کوردستانێ و پیدڤیاتیا ب زانستیکرنا ڤان کێشان ب رێکا ڤەکرنا سەنتەرێن جيَندەرناسی ل زانکویێن کوردستانێ ھاتە گەنگەشە کرن.
*د ڤی كونفرانسی دا دو پانێل هاتنه پێشكێشكرن:
پانێلێ ئێكێ: سه‌نته‌رێن جێنده‌رناسی ل زانكویێن كوردستانێ دناڤبه‌را كار و ئارمانجا دا.
د ڤی پانيَلی دا نوینەرێن زانکویێن: سولەیمانی ، سوران، ئەمریکیا سولەیمانی، کو دەستپێشخەر بوون بو ڤەکرنا ڤی سەنتەری ل زانکویێن خو کار و چالاکیێن ڤان سەنتەران شروڤە کرن.
ھەروەسا ل دەستپێکا پانيَلی ئێكێ، نوینەرا زانکویا پولیتەکنیکی یا دھوک،د. زوبه‌یدا سه‌ید سالح به‌حس ل پێدڤیا سه‌نته‌رێن دیراساتا جێنده‌ری ل زانكویێن كوردستانێ كر و ئاماژە ب ھەبوونا ڤان سەنتەران ھەر ژ دەستپێکا سالێن ١٩٧٠ یێ ل زوربەی زانکویێن جیھانێ کر، بو ھندێ کو پرسا ژنێ بھێتە چارەسەر کرن و گۆت: پیدڤیە کومەلگەھ ب ھەموو یەکێن خوڤە بھێتە ڤەخاندن و ئەڤە ژی ئەرکێ زانکویایە کو ب رێكا ڤان سەنتەران دشێن پرسا ژنان زانستی بکەن.
پانيَلێ دوویێ: لدور دوخێ خانمێن کوردستانێ ل روانگا پرسێن جيَندەری بوو، کو ژلایێ چالاکڤانێن بوارێ ژنانڤە ھاتە پێشکێشکرن. د ڤی پانيَلێ دا گرنگی یا ڤەخاندنا بارودوخێ ژنان ب رێکا ڤةکولینێن زانستی و چاوانەتیا مفا وەرگرتن ژ ئەزمونا سەنتەرێن جيَندەرناسی یێن وەلاتێن پێشکەفتی یان ئەو وەلاتێن ل قوناخا پێشکەفتنێ دا ھاتە کرن.