رویدان

ل ژێر دروشمێ به‌ره‌ف گه‌شت و گوزاره‌كا سه‌رده‌ميانه‌ ئه‌ڤرو روژا پێنج شه‌مبى رێكه‌فتى2/6/2022 ل هولا په‌يمانگه‌ها ته‌كنيكى يا ئامێديێ، ب ئاماده‌بوونا هه‌ژماره‌كا زوور ژ رێڤه‌به‌ر و سه‌روك زانكو و دام و ده‌زگه‌هێن حكومى و حزبى و له‌شكه‌رى و كه‌سايه‌تى و وه‌به‌رهێنه‌رێن بوارێ گه‌شت و گوزارێ، ديدار و فێستيڤالا قوبه‌هان يا گه‌شت و گوزارى يا ئێكێ ، ژ لايێ زانكويا پوليته‌كنيكى يا دهوكێ و رێڤه‌به‌ريا گشتى يا گه‌شت و گوزارا دهوكێ ب هه‌ڤكارى دگه‌ل قايمقاميا ئامێديێ هاته‌ سازكرن.

د يدارێ دا پشتى ده‌قا رێزگرتنێ ژ خوينا شه‌هيدان، په‌يڤا بخێرهاتنێ ژ لايێ پ.هـ.د.هكار زكى راگرێ په‌يمانگه‌ها ته‌كنيكى يا ئامێديێ هاته‌ پێشكێشكرن، پاشان په‌يڤا ديدار و فێستيڤالێ ژ لايێ پ.د.ئارى عادل سه‌روكا زانكويا پوليته‌كنيكى يا دهوكێ ڤه‌ هاته‌ پێشكێشكرن، ل دويف بريارا زانكويێ برياره‌ سالانه‌ ئه‌ڤ ديداره‌ ل ئامێديێ بهێته‌ سازكرن.

ل دوڤدا دوو په‌نه‌ل د ديدارێ دا هاتنه‌ پێشكێشكرن ب مێڤانداريا ڤان به‌رێزان: په‌نه‌لێ ئێكێ (پ.د.كاوه‌ شاوه‌لى) ماموستا و دبلوماتكارێ كورد ل پاريس، (سيروان بارزانى) سه‌رمايه‌دار و وه‌به‌رهێنه‌ر ل بوارێ گه‌شت و گوزارێ، (د.ئاراز خوشناو) ماموستايێ زانكويێ و سه‌روكێ سه‌نته‌رێ زانيارى و لێكولينێن زانستى ل كوردستانێ به‌شدارى په‌نه‌لى بوون، د په‌نه‌لى دا به‌حس ل ديروكا گه‌شت و گوزارێ و ئه‌و به‌ربه‌ستێن دكه‌ڤنه‌ د رێكا وه‌به‌رهێنه‌راندا ل بوارێ گه‌شت و گوزارێ و رولێ زانكويان د پێشخستن و گه‌شه‌پێدانا گه‌شت و گوزارێ دا هاتنه‌ گه‌نگه‌شه‌كرن و به‌حسكرن.

د په‌نه‌لێ دوويێ دا ژى به‌رێزان: (د.محمد شكرى) سه‌روكێ ده‌سته‌يا گشتى يا وه‌به‌رهێنانێ و (د.جوتيار عادل) په‌يڤدارێ حكومه‌تا هه‌رێما كوردستانێ و (محمد محسن) سه‌روكێ جڤاتا پێشڤه‌برنا ئامێديێ به‌شدارى په‌نه‌لى بوون و گه‌نگه‌شه‌ ل سه‌ر چه‌ند ته‌وه‌رێن جودا جودا هاته‌ كرن مينا هزرو ديدێن حكومه‌تێ بو وه‌به‌رهێنانێ د بوارێ گه‌شت و گوزارێ دا ، هه‌روه‌سا رولێ راگه‌هاندنێ د وه‌رارا گه‌شت و گوزارێ دا، وه‌ چ باشه‌ بهێته‌ كرن بو پتر پێشخستنا كه‌رتێ گه‌شت و گوزارى ل ده‌ڤه‌رێ.

پاشان خه‌لاتێ قوبه‌هان ژ لايێ (پ.د.ئارى عادل) سه‌روكا زانكويێ ڤه‌ ب به‌شداربوويێن په‌نه‌لان هاته‌ به‌خشين.

ل دانێ ئێڤارى ژى فێستيڤالا قوبه‌هان يا گه‌شت و گوزارێ ژ لايێ به‌شداربوويێن ديدار و فێستيڤالا قوبه‌هان يا گه‌شت و گوزارى يا ئێكێ ل گوره‌پانا وه‌رزشى يا ئامێديێ هاته‌ ڤه‌كرن و بو ده‌مێ دوو روژان دێ يا به‌رده‌وام بيت، كو تێدا پێشانگه‌هه‌كا وێنه‌يێن شينوارى و ديروكى و گه‌شت و گوزارى يێن ده‌ڤه‌را ئامێديێ هاتبوونه‌ نيشاندان، هه‌روه‌سا هه‌ژماره‌كا چادران هاتبوونه‌ دانان و تێدا كه‌ل و په‌لێن شينوارى و جهێن گه‌شت و گوزارى و فلكلورى و خارنێن كوردى هاتبوونه‌ نيشاندان.

قه‌تران محمد

به‌رپرسێ راگه‌هاندنا په‌يمانگه‌ها ته‌كنيكى يا ئامێديێ‌