په‌یاما سه‌رۆكا زانكۆیا پۆلیتەکنیکى یا دهۆک


2021-09-09 02:14:40

په‌یاما سه‌رۆكا زانكۆیا پۆلیتەکنیکى یا دهۆک

(پ. ھ. د. ئاری عادل عبدالقادر)

 

ماموســـــــــتایێن بـــــهـــا گــــــــــــــــــــــــــران

فەرمانبەرێن ماندو نەنیاس

قـــــــــــوتــــــابیـــــــــێن خـــــــــــــــــــــوشتـــــــــــــڤى

خواندەڤان و لایەنێن پەیوەندیدار و حەژێکەر و پشتەڤانێن زانست و زانینێ ب هه‌لكه‌فتا ده‌ستپێكرنا ساڵا نوی یا خواندنێ  (2022-2021) ئەوا دێ ل رێکەفتى 11/9/2021دەستپێکەت.

گەرمترین پیروزباهیان ئاراستەى هەوەیێن رێزدار دکەم و داخوازا سەرکەفتنێ و پێشڤەچوون و داهێنانێ بو قوتابیێن خوشتڤى دخوازم و هەروەسا رولێ فەرمانبەرێن زانکۆیێ ژى بلند دنرخینین پێخەمەت خزمەتا وان یا روژانە.

ل دەستپێکێ سەرێ رێز و نەوازشێ بۆ خێزان و بنەمالێن شەهیدێن سەربلندێن کوردستانێ    دچەمینین كو گیانێ خۆ كریه‌ قوربان ژ پێخه‌مه‌ت ئاخا کوردستانێ، و ب خەباتا ئەوان ئه‌ڤرۆ ئەم خودان زانكۆیا پۆلیتەکنیکی یا دهۆکین.

کەیف خوشین ب ڤەکرنا دەرگەهێن هولێن خواندنێ و ڤەگەراندنا قوتابیان بۆ دناف کەمپێن کولیژ و پەیمانگەهێن زانکۆیا پۆلیتەکنیکى یا دهۆک دا، فەرە ژبیر نەکەین و رێنمای و راسپاردێن ساخلەمیێ ل بەر چاف وەربگرتن چونکى پرۆسێسا خواندنێ یا ئەف سالە دێ یا جودا بیت ژ سالا بورى ئەگەر رەوشا ساخلەمیێ ب تۆشبوونێن كۆرۆنایێ به‌ره‌ڤ خرابیێ ڤه‌ نه‌چیت، ژبەر ئەڤێ چەندێ دێ یا باشتر بیت کومبوون و خرڤەبونێن قوتابیان بتنێ دناڤ ھولێن خوندنێ دا بن پێخەمەت ئەوێ چەندێ ئەم ببینە جھێ باوەری و دلخوشی و ڤەگەراندنا ھیڤی و ئۆمێدێن قوتابیان و ماموستا ب دیدارێن ئەوان یێن زانستی شاد ببن، و بۆ ڤێ مەرەمێ ژی قوربانی دان و بزاڤێن رژد بۆ دڤێن ھەتا ئەم بشێین پێکڤە سالا نوی یا خواندنێ ب ئارامی و تەندروستی و ب کێمترین زەرەرێن گیانی دەرباز بکەین و کەس و کار و خوشتڤیێن خو ژ کۆرۆنایێ پارێزین.

پلانا مە بۆ سالا نوی یا خواندنێ، دێ بلندکرنا ئاستێ زانستی یێ قوتابیان و پەرەپێدانا ھێز و شیانێن ماموستایان و خورتکرنا پەیوەندیێن نافخوی و نێڤدەولەتی و بەرەڤ پێشڤەچوونا رێزێن ئێکێ یێن رێزبەندییا نشتیمانی و جیھانی یێن زانکۆیان بیت،

هەروەسا دێ بزاڤێن مە دبەردەوام بن پێخه‌مه‌ت پرکرنا پێتڤییا بازارێ کاری و بلندكرن و گه‌شه‌كرنا ئاستێ خواندنێ ل زانكۆیا پۆلیتەکنیکی یا دھۆک، ھەروەسا دێ کار ل سەر وێ چەندێ کەین کو ژینگەھەکا ئارام یا فێرکرنێ بو قوتابیان دابین بکەین و دێ بزاڤێ کەین شێوازێن نوی یێن وانه‌گۆتنێ بکارئینین و دێ رۆلێ قوتابیان چالاککەین د پرۆسا فێربوونێ دا، ھەروەسا دێ خو ماندی کەین کۆ رێژەکا گونجای یا قوتابیێن زانکۆیێ ژ بسپوریێن جوری دناڤ جڤاکی دا دروست بکەین و پێبگەھینین ب وێ مەرەمێ دەمێ ژ زانكۆیێ ده‌ردچن، خەباتێ بکەن بوو وەرارا دەڤەرێ و ببنە هه‌لگرێن زانستێن پێشکەفتی، و تەکنیکێن خواندنێ یێن جورا و جور پەیرەو بکەن و وەکی سەرکردا بن د کارو چالاکیان دا و ببنە خودان كه‌سایه‌تییه‌كا بهێز بوو پاراستنا مافێن گەل و وەلاتی.

ژ لایێ پروژێن دەرچوونێ یێن قوتابیان و ڤەکولینێن زانستی یێن ماموستان ڤە، دێ ھەمی شیانێن خۆ دەینەکاری ببینە پرەکا بھێز دناڤبه‌را زانكۆیێ و پێتڤییا بازاری و پرس و ئاریشەیێن جڤاكی دا، ئانكو پروژێن دەرچوونێ یێن پێتڤیا بازاری دێ کەینە ستراتیژیەتا کارکرنێ و ڤەکولینێن زانستی دێ ل سەر گرفتێن جڤاكی دروستکەین، کۆ ببنە جھێ مفا وه‌رگرتنێ و داھێنانێ و ھزر و بیروکەیێن نوی بکەڤنە دبوارێ جێبەجێکرنێ دا، بۆ خزمه‌تکرنا جڤاكی و سازیێن حكۆمی و کەرتێ پێشەسازی، بۆ بجھئینانا پلانا سالا نوی یا خواندنێ دێ رێکخستنەکا باش و ئاراستەکرنا گونجای بکارئینین ھەتا بشێن کونترولکەین و پلانا خو بگەھینینە ئارمانجێ و ھەمی کارمەندێن زانكۆیێ دێ بنە فاكته‌رێ سه‌ره‌كیێ بو گەھشتنا ئارمانجێ و برێڤەبرنا پروسێسا خواندنێ ل زانکۆیێ.

د ئێكه‌مین په‌یاما خو دا وه‌ك سه‌رۆكا نوی یا‌ زانكۆیێ پێدڤیه‌ ئاماژه‌ بكه‌م كو نه‌زاها ئه‌كادیمی، شه‌فافیه‌ت، یەکسانی، نیشتمانپه‌روه‌ری و رویبرویبوونا هه‌ر كاره‌كێ دویر ژ به‌رژه‌وه‌ندیا گشتی، دێ بو‌هایێن سه‌ره‌كیێن كاركرنا مه‌ بین د زانكۆیێ دا.

ل دووماھیێ فەرە رولێ پێشمه‌رگێن قارەمان و فیداكار و لایه‌نێن ئه‌منی و ئاسایشێ و ھەر لایەنەکێ بەرگیریێ ژ مافێن گەلێ کوردستانێ دکەت ژبیرنەکین و سۆپاسیا ئەوان بکەین چونکی ب ھەبوونا ئەوان ئەف دەرفەتە یا بو مە ھاتیە رەخساندن ئەم به‌رده‌وامیێ ب فێرکرنێ و پرۆسێسا خواندنێ بدەین.

دووبارە سالا نوى یا خواندنێ ل هەوەیێن خوشتڤى پیروز بیت

هیڤیە سالەکا پرى زانست و زانین پێکڤە بورینین.

 

پ. ھ. د. ئاری عادل عبدالقادر

سه‌رۆكا زانكۆیا پۆلیتەکنیکى یا دهۆك

2021/ 9 / 9

© Copyright Duhok Polytechnic University (DPU) - All Rights Reserved

Website Admin: Sarbast Ali