زانکۆیا پۆلیتەکنیکی یا دهۆك دوو ‌یاداشتنامێن لێکتێگەهشتنێ ئیمزا كرن


ب مەرما خورتکرنا پەیوەندیێن نافخوى و نێفدەولەتی دگەل زانکۆیێن ئیراقى و جیهانی یێن باوەرپێکری ژلایێ حکومەتا هەرێما کوردستانێ ڤە، ئەڤرو روژا چوارشەمبى و ل دەمژمێر چوارى ئێڤارى و ب ئامادەبونا (د. حامد احمد خلف) بریکارێ وەزارەتا خاندنا بلند و ڤەکولینێن زانستى یا فیدرالى، دوو‌ یاداشتنامێن لێکتێگەهشتنێ یێن هەفکاریا زانستى، دنافبەرا زانکۆیا پۆلیتەکنیکی یا دهۆک و دوو زانکۆیێن تەکنیکى یێن ئیراقێ، لسەروکاتییا زانکۆیا پۆلیتەکنیکى یا دهۆک هاتنە ئیمزاکرن،

یاداشتناما ئێکێ دنافبەرا (پ. د. عدنان محسن عبدالعزیز) سەروکێ زانکۆیا پۆلیتەکنیکی یا دهۆک و (پ. د. عبدالمحسن ناجي المحيسن) سەروکێ زانکۆیا تەکنیکى یا ناڤەراست (بغداد)، هاتە ئیمزاکرن.

ویاداشتناما دووێ دنافبەرا (پ. د. عدنان محسن عبدالعزیز) سەروکێ زانکۆیا پۆلیتەکنیکی یا دهۆک و(پ. د. مظفر صادق الزهيري) سەروکێ زانکۆیا فورات یا ناڤەراست یا تەکنیکى (النجف)، هاتە ئیمزاکرن.

ناڤەروکا ڤان هەر دوو یاداشتناما ژ سێزدە بەندان پێک دهێن کو پرانییا وان بەندا تەکەزیێ لسەر چه‌ندین خالێن گرنگ دکەن کو پێک دهێن ژ هەفکاریا زانستى و ئالوگورکرنا ئەکادیمی و زانستى، هەردیسان گەشەپێدانا پروژێن ڤەکولینا یێن هەفپشک، و رێکخستنا کونفرانس و سمینار و وانەیێن هەفپشک، و ئالوگورکرنا بەرنامێن وانە گوتنێ و ڤەکولینێن ئەکادیمی،

هەر لسەر ئیمزاکرنا ڤان یاداشتنامان (م. محمد عبدالقادر) رێڤەبەرێ پەیوەندیێن نێفدەولەتى ل زانکۆیا پۆلیتەکنیکی یا دهۆک گوت: پێشتر زانکۆیا مە رێکەفتنێن ب ڤی رەنگی دگەل گشت زانکۆیێن پۆلیتەکنیکى یێن هەرێما کوردستانێ و سێ زانکۆێن تەکنیکى یێن ئیراقێ ئیمزاکرینە، و رولێ (پ. د. علیاء عباس علي العطار( سەروکا زانکۆیا تەکنیکى یا باکۆر بلند دنرخینم ژبو هەفکاریا وێ یا خورتکرنا پەیوەندیان دنافبەرا زانکۆیا پۆلیتەکنیکى یا دهۆک و زانکۆیێن تەکنیکى یێن ئیراقا فیدرال و هەروەسا مامۆستا محەمەدى ئەو چەندە ژى ئاشکرا کر کو ل دەمەکێ نێزیک دێ دگەل زانکۆیا تەکنیکى یا باشور(البصرة) ژى رێککەڤن.

© Copyright Duhok Polytechnic University (DPU) - All Rights Reserved

Website Admin: Sarbast Ali