روينشتنا (٨)ێ يا جڤاتا زانكۆيا پۆليتەكنيكى يا دهۆك ب ئامادەبونا ١٣٢ ماموستا و نوينەرێن قوتابيان هاتە ئەنجامدان.


 ئەڤرو روژا پێنچ شەمبى رێكەفتى ١٤/٥/٢٠٢٠ و لدەمژمێر ٩:٣٠ شەف، ب سەرپەرشتى و چاڤدێريا (پ. د. عدنان محسن عبدالعزيز) سەروكێ زانكۆيا پۆليتەكنيكى يا دهۆك، روينشتنا (٨)ێ ب رێكا ئونلاين يا جڤاتا زانكۆيا پۆليتەكنيكى يا دهۆک ب ئامادەبونا ١٣٢ ماموستا و نوينەرێن قوتابيان هاتە ئەنجامدان.

 

دڤێ روينشتنا ئونلاين دا ئەوا بو دەمێ ٤ دەمژمێرا ڤەكێشاى، نوينەرێن قوتابيان ل گشت كوليژ و پەيمانگەهێن تەكنيكى يێن زانكۆيا پۆليتەكنيكى يا دهۆك ژلايێ سەروكێ زانكۆيێ و ئەندامێن جڤاتا زانكۆيێ ڤە هاتبونە داخازكرن ژبو گەهاندنا پشنيار و ئاريشە و گازندێن قوتابيان لسەر رەوشا خاندنا ئەلكترونى و پلانا پشنياركرى يا زانكۆيێ.

ل دەست پێكا روينشتنێ سەروكێ زانكۆيێ دەليڤە دا نوينەرێن قوتابيان، ژبو دياركرنا وانە ئاستەنگان يێن دبنە رێگر بەرامبەر قوتابيان ژبو بەردەوامى دانا خاندنا ئەلكترونى و پلانا پشنياركرى يا زانكۆیێ، و ديڤدا هەر ئێك ژ نوينەرێن قوتابيان (احمد سليمان) بەرپرسێ لقا ئێكەتيا قوتابيان ل سنورێ پارێزگەها دهوكێ، و( رێبين عبدالسلام ) وەكە نوينەرێ قوتابيێن كوليژێ و پەيمانگەها تەكنيكى ئاكرێ، و (دلشاد اسماعيل) نوينەرێ قوتابيێن پەيمانگەها تەكنيكى ئامێديێ، و (بهجت عبدالرحمن) نوينەرێ قوتابيێن پەيمانگەها تەكنيكى زاخۆ، و (هيرش شڤان) نوينەرێ قوتابیێن كوليژا تەكنیكى و زانستێن پەترول وكانزا ل زاخو، و (ئارمانج حسن) نوينەرێ قوتابيێن پەيمانگەها تەكنيكى بەردەرەش، و(اياد كمال و رێناس دنەيى) نوينەرێن قوتابيێن پەيمانگەها تەكنيكى شنگال، و (دلدار احمد) نوينەرێ قوتابيێن كوليژا تەكنيكى تەندروستى شێخان و پەيمانگەها تەكنيكى شێخان، و هەر ئێك ژ نوينەرێن قوتابيان ل دهوكێ (دلوار لقمان) ژ كوليژا تەكنيكى ئەندازيارى دهوك، و (هيژا محمد سعيد) ژ كوليژا تەكنيكى كارگێرى دهوك، و (توران عابد) ژ پەيمانگەها تەكنيكى كارگێرى، و (نوڤين انور و سعيد غازى) ژ پەيمانگەها تەكنيكى دهوك، گشت ئاريشە و گازندە و پشنيارێن قوتابيان ل هەر شەش كوليژ و هەر هەشت پەيمانگەهێن تەكنيكى يێن زانكۆيا پۆليتەكينكى يا دهۆك گەهاندەنە سەروك و ئەندامێن جڤاتا زانكويێ.

و ژلايێ خوڤە (پ. د. عدنان محسن عبدالعزيز) سەروكێ جڤاتا زانكۆيێ سوپاسيا نوينەرێن قوتابيان كر و پشنيار و ئاريشە و گازندە و بوچونێن قوتابيان بەرچاف وەرگرتن و هندەك ژ وان ئاريشەيان كو تايبەت بون ب خاندنا ئەلكترونى ڤە، هەر دوى دەمى دا و ب رێكا راگرێن كوليژ و پەيمانگەهان هاتنە چارەسەركرن، 

وديڤدا سەروكێ زانكۆيێ جودا دگەل ماموستايێن زانكويێ كومبو و پشنيارێن وان ژى وەرگرتن لسەر بەردەوامى دانا خاندنا ئەلكترونى و پلانا بهێت يا زانكۆیێ، وپشتى پشنيارێن ماموستايان وەرگرتين (پ. د. عدنان محسن) تەكەزى لسەر بەردەوامى دانا خاندنا ئەلكترونى كر و هەروەسا ئاماژە ب وێ چەندێ ژى كر كو قوتابى پێگيريێ ب خاندنا ئەلكترونى بكەن ودوير كەڤن ژ بايكوتكرنێ، چونكى خاندنا ئەلكترونى يا پالپشتكار دێ يا بەردەوام بيت بو سالێن بێت ژى و دەبيت قوتابى دئاگەهداربن كو ل ديف فەرمانا زانكويێ يا ژمارە ١٣٠ نمرە لسەر خاندنا ئەلكترونى يا پالپشتكار هاتينە دانان و هەروەسا ژلايەكێ ديڤە سەروكێ زانكۆيێ تەكەزى لسەر بابەتێن وانەيان ژى كر ئەوێن ژلايێ ماموستايان ڤە هاتينە ئەپلودكرن د موودلى دا و گوت: ئەگەر كێشەيەك د داونلوكرنا وان بابەتان دا هەبيت دەبيت ماموستا دووبارە وان وانەيان ئەپلود كەتە ڤە، و ئەگەر رەوشا ساخلەميا پارێزگەها دهوكێ و هەرێما كوردستانێ باشتر لێهات دێ ل ٣٠/٥/٢٠٢٠ وانە دناف هولێن خاندنێ ل كەمپێن زانكويێ هێنە شروڤەكرن و شلوڤەكرن.

و ل دووماهيێ سەروكێ جڤاتا زانكۆيێ و هاريكارێن سەروكێ زانكويێ و راگرێن كوليژ و پەيمانگەهێن تەكنيكى و ئەندامێن جڤاتا زانكويێ گەنگەشە لسەر گازندە و ئاريشێن قوتابيان كرن و چەندين تەوەرێن دى گەنگەشەكرن، و پلانا پشنياركرى يا زانكۆيا پۆليتەكنيكى يا دهۆك، دگەل بوچونێن ماموستا و قوتابيان ب هەماهەنگى دگەل زانكويێن دهوك و زاخو هێنە گەنگەشەكرن ژبو باشترين هەلبژارتنا دبەرژەوەنديا زانكويێ و قوتابيان دا و ئەف چەندە وەك نڤيسارەك دێ ژلايێ زانكوێن پارێزگەها دهوكێ ڤە ل روژا دوو شەمبيا بێت كو دبيتە ١٨/٥/٢٠٢٠ دناف جڤاتا وەزارەتا خاندنا بلند و ڤەكولينێن زانستى دا هێتە ئاراستەكرن بو وەزيرێ خاندنا بلند و ئەنداميێن جڤاتا وەزارەتێ، و ديڤدا دێ بريار ژلايێ زانكۆيێ ڤە هيێتە دان لسەر پلانا نوى يا خاندنێ ئەو ژى ئەگەر رەوشا ساخلەميێ بەرەف باشيێ بچيت وچ توشبووێن نوى ب ڤایروسێ كورونا نە هێنە توماركرن.

 

© Copyright Duhok Polytechnic University (DPU) - All Rights Reserved

Website Admin: Sarbast Ali