ھلبژارتنێن گونجای لبەر دەستن بۆ پاراستنا خاندنا ئەف سالە


2020-03-22 12:51:56


ئەڤرۆ رۆژا ئێک شەمبی ڕێکەفتی (٢٢/٣/٢٠٢٠) ب سەرپەرشتا د. ئارام محمد قادر سەرۆکێ جڤاتا وەزارەتا خاندنا بڵند و ڤەکولینێن زانستی و ب پشکداریا پ. د. عەدنان محسن عەبدولعەزیز سەروکێ زانکۆیا پۆلیتەکنیکی یا دھۆک کومبونا سێ یێ یا جڤاتا وەزارەتا خاندنا بڵند ل دویف پێگیریا رێنمایێن ساخلەمیێ ب رێکا ڤیدیۆ كۆنفرانس ھاتە ئەنجامدان.

ل دەستپێکا کومبونێ وەزیرێ خاندنا بڵند و ڤەکولینێن زانستی د پەیڤەکێ دا ئاماژە ب رێنمایێن پێگیرکرنێ و خوپاراستنێ ژ ڤایروسێ کۆڕۆنا(COVID-19)دانە دیارکرن و پێنگاڤێن بەرھنگاربونا حکومەتا هەرێما کوردستانێ ب پرۆسێسەکا سەرکەفتی نرخاندن.

و دتەوەرەکێ دی دا گەنگەشێن زانستی دەربارەی پڵان و پشنیارێن زانکۆ و دەزگەھێن وەزارەتێ دانە دیارکرن سەبارەت بەردەوامی دان ب پروسێسا خاندنێ لدەمێ درێژ بونا بھێنڤەدانێ ژبەر ڤێ ئێشا ڤەگڕ، و ھەروەسا پشنیارا خاندنا ئونلاین و بکارئینانا پلاتفۆرما نوکە ژلایێ سەروکاتیا جڤاتا وەزیران ڤە ئەوا نوکە کار بۆ دھێتە کرن لایەکێ دی یێ ڤێ کومبونێ بو.

و ھەر دڤێ کۆمبونێ دا ھەر ئێک ژ بریکارێن وەزارەتێ و سەرۆک زانکۆیان و ڕاوێژکارو رێڤەبەرێن گشتی تێبینێن خۆ پێشکێشکرن و پڵان و پشنیارێن پێتڤی بۆ پاراستنا پروسێسا خاندنێ دانە خویاکرن، و ب پتریا دەنگان بریار ھاتە دان کۆ هەمی ھێز و شیانێن خو یێن مرۆیی و لۆجیستی یێن دەزگەھێن خاندنا بڵند دێ بکار ئینن بۆ پاراستنا پرۆسێسا خاندنا ئەف ساڵە، ئەوژی ب ھەماھەنگیا لیژنا بڵند یا بەرھنگاربۆنا ئیشا کورونا و بەرچاف وەرگرتنا بارێ ساخلەمی و پێگیربون ب رێنمایان و د ئایندەیی دا دێ بریارێن پێتڤی دەربارەی میکانیزما بەردەوامبونا پروسێسا خاندنێ ھێنە دان.

ھەروەسا چڤاتا وەزارەتا خاندنا بڵند قوتابیان و خوێندکاران پشت راست دکەت کو ھلبژارتنێن گونجای لبەر دەستن بۆ پاراستنا خاندنا ئەف سالە، ھەتا دگەھیتە پەیرەوکرنا شێواز و سیستەمێ ئۆنلاین کو ئێکە ژ وان ھەلبژارتنانە، وھەر دڤێ کومبونێ دا داخاز ژ زانکویان ھاتە کرن کو ژڵایێ لۆجیستی و تەکنیکی ڤە ئامادەکاریێن پێتڤی بھێنە کرن.

ل دووماھیا کومبونێ ئەندامێن جڤاتا وەزارەتێ رژد بوون ل سەر وێ پرەنسیپێ کۆ سەرباری گرفت و رێگریان، دشیانێن زانکۆیێن ھەرێما کوردستانێ دایە پشتەڤانیا تمام یا خوێندکار و قوتابیان بکەن ژبۆ وێ چەندێ ھەمی پێکڤە کار بکەن بۆ پاراستن و بەردەوامی دانا پرۆسێسا خاندنا بڵند ل ھەرێما کوردستانێ.

© Copyright Duhok Polytechnic University (DPU) - All Rights Reserved

Website Admin: Sarbast Ali