پێشخستنا شیانێن پراکتیکی یێن قوتابییان ژ ئارمانجێن گرنگ یێن سەنتەرێ گەشەپێدان بو کاری نە


2019-12-24 01:50:34

 

لروژا سێ شەمبی رێکەفتی 24/12/2019، سەنتەرێ گەشەپێدان بو کاری لزانکویا پولیتەکنیکی یا دهوک و بـ ئامادەبونا بەرێزان هاریکارێ سەروکێ زانکویێ بو کاروبارێن قوتابییان بەرێز د. رجب ابراهیم حمید، رێڤەبەرێ سەنتەرێ گەشەپێدان بو کاری م. بێوار سلیمان حاجی وبەرپرسێ پروگرامێ راهێنانا شیانان م. ئازاد پیرو شاکر، رابو برێكخستنا مەراسیمێن بەخشینا برواناما بو به‌شداربویێن بسه‌ركه‌فتیانه‌ پروگرامێ راهێنانێن شیانان Internship Program بو سالا 2019 ئه‌نجام داین؛ هه‌روه‌سا به‌خشینا برواناما بو وان كومپانی و ده‌زگه‌هێن هه‌ڤكاربوین د سه‌رئێخستنا پروگرامی دا بـ مه‌شقدانا قوتابییان.

هەژی گوتنێ یە کو پروگرامێ راهێنانا شیانان Internship Program دهێتە ئەنجام دان بهەماهەنگی دناڤبەینا رێکخراوا ئایرێکس یا ئەمریکی IREX Organization، حکومەتا هەرێما کوردستانێ و سەنتەرێن گەشەپێدان بو کاری لـ زانکویێن هەرێما کوردستانێ. پێتڤی یە قوتابیێ بەشدار بوی بو ماوێ 100 دەمژمێران یان زێدەتر راهێنانا پراکتیکی و لدیف بسپوریا خو لـ کەرتێ تایبەت ئەنجام بدەت بو نموونە (کومپانی، دەزگەهـ، رێکخراوا، هتد).

بو سالا خاندنێ 2018/ 2019، 18 قوتابیێن زانکویا پولیتەکنیکی یا دهوک لـ پشکێن (تەکنولوژیا زانیاریان، ئاساییشا زانیارییان، روپیڤان و روژنامەڤانیا ئەلێکترونی)  بەشداری پروگرامی بون و راهێنانێن خو بسەرکەفتیانە لـ 7 کومپانی و دەزگەهێن کەرتێ تایبەت ئەنجام دان ئه‌و ژی (كومپانیا ئاسیاسیل/ دهوك، كومپانیا هه‌ژین بو گه‌شت و گوزارێ، راست گروپ، كومپانیا شاهان، تله‌فزیونا دهوك، كومپانیا كوره‌ك تیلیكوم/ ئاكرێ و روژناما ئه‌ڤرو).

ئه‌م وه‌ك سه‌نته‌رێ گه‌شه‌پێدان بو كاری لـ زانكویا پولیته‌كنیكی یا دهوك، سوپاسییا هەمی کومپانی و دەزگەهان دکەین ئەوێن هاریکار بوین دگەل مە بو وەرگرتن و راهێنان پێکرنا قوتابییان. دەست خوشیێ لـ قوتابیێن بەشدار بوی دکەین و داخازا سەرکەفتنێ بو دخازین.

© Copyright Duhok Polytechnic University (DPU) - All Rights Reserved

Website Admin: Sarbast Ali