سالانه ديدارا قوبه‌هان يا گه‌شتيارى دێ ل په‌يمانگه‌ها ئامێديێ هێته سازكرن
رێڤه‌به‌رێ گشتى يێ گه‌شت و گوزارێ ل دهوكێ و ده‌ڤه‌ردارێ ئامێديێ و جڤاتا په‌يمانگه‌ها ئامێديێ كومبوون و بريار دان سالانه ديدارا قوبه‌هان يا گه‌شتيارى بهێته سازكرن
ژبو پێشخستنا كه‌رتێ گه‌شت و گوزارێ ل ده‌ڤه‌را ئامێديێ، په‌يمانگه‌ها ته‌كنيكى يا ئامێديێ ب هه‌ڤكارى و هه‌ماهه‌نگى دگه‌ل رێڤه‌به‌ريا گشتى يا گه‌شت و گوزارێ ل پارێزگه‌ها دهوكێ دێ سالانه ديداره‌كێ ب ناڤێ ديدارا قوبه‌هان يا گه‌شتيارى ل ئامێديێ سازكه‌ن.
ئه‌ڤرو روژا پێنج شه‌مبى رێكه‌فتى 24/2/2022 به‌رێز پ.د.خه‌يرى عه‌لى ئوسو رێڤه‌به‌رێ گشتى يێ گه‌شت و گوزارێ ل پارێزگه‌ها دهوكێ دگه‌ل به‌رێز وارشين سلمان ده‌ڤه‌ردارێ ئامێديێ، و به‌رپرسێ گه‌شت و گوزارا ئامێديێ و به‌رپرسێ لژنا ناوچا ئامێديێ سه‌ره‌دانا په‌يمانگه‌ها ته‌كنيكى يا ئامێديێ كرن و ژ لايێ پ.هـ.د.هكار زكى راگرێ په‌يمانگه‌ها ته‌كنيكى يا ئامێديێ ڤه هاتنه پێشوازيكرن.
د كومبونه‌كێ دا كو ل هولا جڤاتا په‌يمانگه‌هێ برێڤه‌چوو، ل ده‌ستپێكێ پ.هـ.دهكار زكى راگرێ په‌يمانگه‌هێ بخێرهاتنا مێڤانان كر، پاشان به‌حسێ كه‌رتێ گه‌شت و گوزارێ ل ده‌ڤه‌رێ كر و چه‌ند پروژه و پێشنيار بو ئه‌نجامدانا هند كار و پروژه‌يێن هه‌ڤپشك دگه‌ل رێڤه‌به‌ريا گشتى يا گه‌شت و گوزارێ ل پارێزگه‌ها دهوكێ ل سه‌ر پێشخستنا كه‌رتێ گه‌شت و گوزارێ ل ده‌ڤه‌رێ كر، وه‌ك ئه‌نجامدانا ديبه‌يت و په‌نه‌لان يان خولێن راهێنانێ بو وان كه‌س و كادرێن ل جهێن گه‌شتيارى كاردكه‌ن، هه‌روه‌سا پێشنيارا كرنا ڤيسته‌ڤاله‌كێ يان پێشانگه‌هه‌كا گه‌شتيارى يان ئه‌نجامدانا هه‌ر پروژه‌يه‌كێ گه‌شتيارى كو ببيته ئه‌گه‌رێ پێشخستنا كه‌رتێ گه‌شت و گوزارێ ل ده‌ڤه‌را ئامێديێ كر، هه‌روه‌سا ده‌ڤه‌ردارێ ئامێديێ و رێڤه‌به‌رێ گشتى يێ گه‌شت و گوزارێ ل دهوكێ به‌رهه‌ڤيا خو بو ئه‌نجامدانا هه‌ر كار و پروژه‌يه‌كێ بو پێشخستنا كه‌رتێ گه‌شت و گوزارێ ل ده‌ڤه‌ێ دياركرن، پاشان ب به‌رفره‌هى ژ لايێ ئاماده‌بوويان ڤه به‌حسێ چاوانيا پێشخستنا كه‌رتێ گه‌شت و گوزارێ ل ده‌ڤه‌را ئامێديێ هاته كرن و به‌حسا وان كێم و كاسيان هاته كرن كو د رێڤه‌برنا جهێن گه‌شت و گوزارى و كادرێ وان دا هه‌يه، هه‌روه‌سا به‌حسا گرنگى يا پێكڤه كاركرن و هه‌ماهه‌نگى يا دناڤبه‌را رێڤه‌به‌ريا گشتى يا گه‌شت و گوزارێ ل پارێزگه‌ها دهوكێ و پشكا كارگێرى گه‌شتيارى ل په‌يمانگه‌ها ته‌كنيكى يا ئامێديێ وه‌ك جهه‌ك ئه‌كادمى هاته كرن.
ل دوماهيا كومبوونێ بريار ل سه‌ر وێ يه‌كێ هاته دان كو ديداره‌ك ب ناڤێ ديدارا قوبه‌هان يا گه‌شتيارى سالانه ل هه‌يڤا 5 ل په‌يمانگه‌ها ئامێديێ بهێته سازكرن و تێدا چه‌ندين په‌نه‌ل و ديبه‌يت دێ هێنه پێشكێشكرن، هه‌روه‌سا د به‌شه‌كێ دى يێ ديدارێ دا دێ ڤه‌ستيڤاله‌كا گه‌شتيارى هێته ڤه‌كرن، ئه‌ڤ ديداره سالانه ب هه‌ڤكارى و هه‌ماهه‌نگييا په‌يمانگه‌ها ته‌كنيكى يا ئامێديێ و رێڤه‌به‌ريا گشتى يا گه‌شت و گوزارێ ل پارێزگه‌ها دهوكێ و گه‌شت و گوزارا ئامێديێ دێ هێته رێكخستن و سازكرن.
راگه‌هاندنا په‌يمانگه‌هێ