رویدان

ل ژێر درووشمێ‌ (زانست و شیانێن مه‌ دێ‌ كوردستانێ‌ بهێز ئێخیت) و ل ژێر چاڤدێریا سه‌رۆكێ‌ زانكۆیا پولیته‌كنیكی یا دهۆك (پ. د. عه‌دنان محسن عه‌بدولعه‌زیز) ئاهه‌نگا ده‌رچوونا گه‌را شه‌شێ‌ یا قوتابیێن زانكۆیا پۆلیته‌كنیكی یا دهۆك (كۆلیژا ته‌كنیكی ئه‌ندازیاری، كولیژا ته‌كنیكی كارگێری، په‌یمانگه‌ها ته‌كنیكی دهۆك، په‌یمانگه‌ها ته‌كنیكی كارگێری دهۆك، كۆلیژا ته‌كنیكی ته‌ندروستی شێخان، په‌یمانگه‌ها ته‌كنیكی شێخان و په‌یمانگه‌ها ته‌كنیكی شنگال) ئه‌ڤرو رۆژا 25/9/2018ێ‌ ئێڤاری ل گۆره‌پانا چالاكیێن وه‌رزشی و دیده‌ڤانی ل دهۆكێ‌ هاته‌ گێڕان.
پ. د. عه‌دنان محسن عه‌بدولعه‌زیز، سه‌رۆكێ‌ زانكۆیا پولیته‌كنیكی یا دهۆك د په‌یڤه‌كێ‌ دا ئاشكرا كر كو ئه‌ڤرۆ رۆژه‌كا مێژووی یه‌ بۆ هه‌موو كوردستانیان كو ریفراندۆم به‌ری ساله‌كێ‌ وه‌كو ئه‌ڤرۆ هاتبوو ئه‌نجامدان و سه‌نگا ملله‌تێ‌ مه‌ بلندكر و سۆپاسیا سه‌رۆك بارزانی دكه‌ین بۆ پاراستنا مافێن پاشه‌رۆژا گه‌لێ‌ مه‌، كاودانێن ئه‌ڤرۆ ژ مه‌ دخوازن ئه‌م زێده‌تر ل ئاستێ‌ روودانێن ناڤخۆ و هه‌رێمێ‌ و ده‌وله‌تی بین ژبه‌ر ڤێ‌ چه‌ندێ‌ یا گرنگه‌ ل رۆژا 30/9/2018ێ‌ ئه‌م هه‌می پێكڤه‌ قه‌ستا سندوقێن ده‌نگدانێ‌ بكه‌ین بۆ كوردستانه‌كا بهێز و ده‌نگێ‌ خوه‌ بده‌ینه‌ نوونه‌رێن شه‌هید و پێشمه‌رگێ‌ قاره‌مان یێن داستانا پردێ‌ و سحێلا تۆماركری و ئه‌و ئازادیا نوكه‌ ئه‌م تێدا به‌رهه‌مێ‌ ره‌نج و خه‌باتا پێشمه‌رگێن قاره‌مان و خوینا هزاران شه‌هیدانه‌ و گۆت: "سۆپاسیا حوكمه‌تا هه‌رێما كوردستانێ‌ و هه‌موو داموده‌زگه‌هێن حزبی و حكومی و ئێمناهیێ‌ دكه‌م بۆ هاریكاریا وان یا به‌رده‌وام دگه‌ل مه‌، هه‌روه‌سا سۆپاسیا هه‌موو مامۆستا و قوتابیێن زانكۆیا پۆلیته‌كنیكی یا دهۆك دكه‌م.
سه‌ربه‌ست تروانشی، به‌رپرسێ‌ لقێ‌ ئێك و ئه‌ندامێ‌ ئه‌نجۆمه‌نێ‌ سه‌ركردایه‌تیا پارتی دیموكراتی كوردستان د په‌یڤه‌كێ‌ دا د ئاهه‌نگا گه‌را شه‌شێ‌ یا قوتابیێن زانكۆیا پۆلیته‌كنیكی یا دهۆك دیار كر كو سوبه‌هی بارێ‌ ڤی ملله‌تی دێ‌ كه‌ڤیته‌ ل سه‌ر ملێن ڤان قوتابیان كو ئه‌ڤه‌ ده‌مه‌ك بوو ب خوه‌ ڤه‌ ماندووبووین، لێ‌ ئه‌ڤ ماندووبوونه‌ دێ‌ بیته‌ ئه‌گه‌رێ‌ ئاڤاكرنا كوردستانه‌كا جوان بۆ ئه‌ڤرۆ و سوبه‌هیا ئه‌وێن د دووڤ هه‌وه‌ ڕا ژی دهێن، چونكی مه‌ هه‌موویان پێدڤی ب كوردستانه‌كا ب هێز هه‌یه‌، له‌وڕا پشته‌ڤانیا هه‌وه‌ بۆ لیستا 183 یا پارتی دیموكراتی كوردستان و به‌ربژارێن وێ‌ پاشه‌رۆژه‌كا گه‌شتر و رۆهنتر دێ‌ بۆ هه‌موو خه‌لكێ‌ كوردستانێ‌ په‌یدابیت.